L-Awtorità Maltija għat-Turiżmu se tkun qed tiffinanzja €115,000 sabiex
jitkomplew u eventwalment jitlestew ix-xogħlijiet ta’ manutenzjoni u restawr li
għaddejjin fuq il-Lascaris War Rooms u l-Mużew Time-Gun fil-Belt Valletta. Dan
ħabbritu l-Ministru għat-Turiżmu u l-Protezzjoni tal-Konsumatur Julia Farrugia
Portelli kmieni llum fis-Saluting Battery fl-okkażjoni tat-78 anniversarju minn
meta Malta ngħatat il-George Cross.
Ix-xogħol ta’ restawr qed tieħu ħsiebu l-Fondazzjoni Wirt Artna u qed isir
fil-Lascaris War Rooms li jinsabu taħt il-Barrakka sabiex jiġu lura għall-istat
oriġinali tagħhom li jikkumplimenta il-mużew il-ġdid Operation Husky li se
jinfetaħ ħdejh. Apparti minn hekk, qed isiru wkoll xogħlijiet fuq mużew iżgħar,
Time-Gun, li se jkun qed jikkumplimenta s-Saluting Battery. Minkejja
l-pandemija li għaddejjin minnha bħalissa, l-isparatura sinonima mal-Barrakka u
li tattira mas-700,000 turist, baqgħet issir kuljum f’nofsinhar.
Il-Ministru Julia Farrugia Portelli qalet li din hija parti mill-istorja
ta’ pajjiżna li timmerita li t-turist li jiġi jżurna jista’ jsegwi dak li ġara
fl-imgħoddi. B’investiment ta’ €115,000 mill-Awtorità Maltija għat-Turiżmu hija
tkellmet dwar kif dan il-proġett se jkompli jsaħħaħ il-prodott turistiku. Julia
Farrugia Portelli sostniet li ż-żmien ta’ sfida li għaddejjin minnu bħalissa
qed jiġi utilizzat bħala opportunità biex isiru xogħolijiet neċessarji biex
eventwalment malli pajjiżna jkun jista’ jerġa’ jospita lit-turisti, dawn jaraw
tisbiħ fuq numru ta' siti storiċi u postijiet pubbliċi bl-għan li ntejbu l-prodott
turistiku tagħna.
Min-naħa tiegħu, iċ-Chairman tal-Awtorità Maltija għat-Turiżmu Dr Gavin
Gulia qal li n-numru tat-turisti li jżuru pajjiżna hu importanti daqs kemm hu
importanti wkoll il-prodott għaliex wara kollox it-turisti jżuru pajjiżna biex
jaraw il-prodott tagħna. Huwa stqarr li bħala Awtorità qed jaħdmu biex
jippromwovu lill-Belt Valletta bħala destinazzjoni bl-impenn tal-Awtorità
jibqa’ dak li jinvestu u jikkonservaw il-prodott.
Il-Kap Eżekuttiv tal-Fondazzjoni Wirt Artna s-Sur Mario Farrugia spjega li
permezz tal-għajnuna li l-Fondazzjoni Wirt Artna qiegħda tirċievi mill-Awtorità
Maltija għat-Turiżmu u mill-Ministeru għat-Turiżmu u l-Protezzjoni
tal-Konsumatur se tkun tista’ tbiddel il-war rooms lura għall-istat oriġinali
tagħhom proprju meta kienu jintużaw bħala headquarters għall-invażjoni ta’
Sqallija.
Is-Sindku tal-Belt Valletta s-Sur Alfred Zammit qal li l-Belt Valletta hija
popolari ħafna mat-turisti, fil-fatt aktar minn 90% tat-turisti li jżuru
pajjiżna jżuru l-Belt Valletta. Huwa rringrazzja lill-Ministeru, l-Awtorità
Maltija għat-Turiżmu, u l-Fondazzjoni li permezz tal-ħidma tagħhom post ieħor
fil-Belt se jkun rinovat b’tali mod li t-turist se jsibu fl-aqwa tiegħu. Huwa
sostna li mhux biss għandu jgawdi minnu t-turist imma wkoll il-Malti li tajjeb
li jinteressa ruħu fl-istorja ta’ pajjiżna.
Preżenti kien hemm ukoll id-Direttur dwar l-Iżvilupp tal-Prodott fi ħdan
l-istess Awtorità, is-Sur Kevin Fsadni.
