Skip Ribbon Commands
Skip to main content

gov.mt

pr201009

PR201009

28/05/2020

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Xogħlijiet f’Mater Dei biex pajjiżna jkollu sala għal mard infettiv ta’ riskju għoli

Fl-Isptar Mater Dei, fi ħdan is-sala tal-mard infettiv, għaddejjin xogħlijiet strutturali biex tinbena unit speċjalizzata fejn se jkunu trattati pazjenti b' każijiet rari ta' infezzjoni li jkunu ta' riskju ferm għoli li jinxtered fil-komunità.

 

Dan il-proġett qed isir b'investiment ta' €1.7m, li hu parzjalment iffinanzjat minn fondi Ewropej, mill-Fond għall-Ażil, il-Migrazzjoni u l-Integrazzjoni.

 

Waqt żjara fuq il-post, id-Deputat Prim Ministru u Ministru għas-Saħħa Chris Fearne, spjega li bil-High Degree Isolation Unit, pajjiżna se jkun ippreparat ukoll għall-eventwalità ta' każijiet infettivi bħall-Marburg virus, Dengue, Ebola, Lassa fever, Sars Co-V u razez patoġeniċi għolja tal-virus tal-influwenza.

 

“Sal-aħħar tas-sena Mater Dei se jkun wieħed mill-ftit ċentri fl-Ewropa li jista' jilqa' dawn it-tip ta' pazjenti, joffri servizz tal-aqwa kwalità, bla ebda periklu lill-istaff mediku", sostna d-Deputat Prim Ministru Fearne.

 

Ix-xogħlijiet strutturali huma kkordinati mill-Fondazzjoni għas-Servizzi Mediċi (FMS), filwaqt li d-disinn huwa mfassal minn esperti lokali u barranin, b'kollaborazzjoni mal-esperti mediċi tal-Isptar Mater Dei. 

 

L-Uffiċjal Kap Operattiv tal-FMS, Andrew Vella Zarb, spjega li biex dan il-unit jikseb l-ogħla ċertifikat ta' sigurtà kien jeħtieġ numru ta' rekwiżiti strutturali u ta' inġinerija addizzjonali minn swali oħra fl-isptar, b'mod partikolari fis-sistema tal-purifikazzjoni tal-arja. ​​