Informazzjoni f’Każ ta’ Emerġenza

​Emergency Services
Informazzjoni f’Każ ta’ Emerġenza

X’għandek tagħmel meta tinqala’ emerġenza?

112
huwa n-numru li għandek iċċempel għas-servizzi kollha ta’ emerġenza f’Malta (ambulanza, pulizija jew f’każ ta’ nirien).

Malli jwieġbek l-operatur agħtih immedjatament in-numru tat-telefown tiegħek, biex ikunu jistgħu jċemplulek lura jekk jinqala’ l-bżonn, imbagħad agħti wkoll l-indirizz tal-post fejn hemm bżonn tintbagħat l-għajnuna u spjega x’tip ta’ inċident hu, kemm hemm persuni involuti fih u x’perikli oħra taħseb li hemm.

Spjega kif jistgħu jaslu fuq il-post, u jekk jista’ jkun ibgħat lil xi ħadd jiltaqa’ mas-Servizzi tal-Emerġenza biex iwassalhom bla telf ta’ ħin fuq il-post tal-inċident. Żomm lill-operatur aġġornat bis-sitwazzjoni u ħu ħsieb li tavżah jekk l-għajnuna li tkun tlabt ma tkunx meħtieġa iktar. Taqtax it-telefown qabel jgħidlek l-operatur!

Is-servizzi tal-emerġenza qegħdin hemm biex jipprovdu sokkors u jsalvaw ħajjet in-nies. Qatt tagħmel telefonati biex toħloq allarm fittizju jew biex tgħaddi ż-żmien – dan itellef ħin prezzjuż li jista’ jagħmel id-differenza bejn il-ħajja u l-mewt.


X’għandek tagħmel f’emerġenza barra mill-pajjiż

Jekk issib ruħek f’sitwazzjoni ta’ kriżi jew emerġenza waqt li tkun barra minn Malta, u wara li tiżgura li ħajtek u ħajjet il-vjaġġaturi sħabek ma jkunux fil-periklu, għandek tikkuntattja lil qrabatek u lill-ħbieb tiegħek biex isserrħilhom rashom u tevita li jinqala’ paniku bla bżonn. Huwa rrakkomandat ukoll li tikkuntattja lill-eqreb Ambaxxata Maltija, Konsulat jew Ministeru tal-Affarijiet Barranin, biex tinfurmahom li intom tinsabu qawwijin u sħaħ.

Għal lista sħiħa tar-Rappreżentanzi Diplomatiċi Maltin barra mill-pajjiż, ikklikkja
hawn.


Numri Utli Oħra

 
   Is-Servizzi kollha ta' Emerġenza​ 112​
​​   Il-Pulizija ta’ Malta 2122 4001 - 9​                                
​   Id-Dipartiment tal-Protezzjoni Ċivili ​2393 0000
​   Il-Forzi Armati ta’ Malta ​2249 4000/2249 4019-20
​   Il-Gwardjani Lokali ​2132 0202
​   L-Isptar ta’ Malta ​2545 0000
​   L-Isptar ta’ Għawdex ​2156 1600
​   Salvataġġ ta’ Emerġenza bil-Ħelikopter ​2124 4371
​   Salvataġġ ta’ Emerġenza bil-Patrol Boat ​2123 8797
   Servizz Veterinarju ta’ Emerġenza ​5004 3888
​   Servizzi ta’ Informazzjoni tal-Gvern ​153
​   Servizz ta’ Direttorju Telefoniku ​1182


Korsijiet tal-Ewwel Għajnuna f’Malta

Kors tal-ewwel għajnuna jiswa ferm bħala tħejjija dwar x’għandek tagħmel f’każ ta’ emerġenza. Is-
St John Ambulance u r-Red Cross Malta joffru korsijiet fuq bażi regolari, u dejjem ikollhom bżonn volontiera biex jgħinuhom fil-ħidmiet tagħhom.​

​​​​​​​​​​