Il-Ministru għall-Affarijiet Barranin u Ewropej Chris Fearne ltaqa’ mad-Deputat Prim Ministru u Ministru għall-Affarijiet Barranin tal-Polonja Radosław Sikorski f’Varsavja, fejn iż-żewġ naħat tennew ir-relazzjonijiet b’saħħithom bejn Malta u l-Polonja u qablu dwar l-importanza li jkomplu jsaħħu l-kooperazzjoni fl-oqsma politiċi, ekonomiċi u Ewropej.
Il-Ministri ddiskutew opportunitajiet biex ikomplu jissaħħu r-rabtiet bilaterali, fosthom permezz ta’ aktar kummerċ u investiment, kif ukoll kooperazzjoni fit-teknoloġija, l-innovazzjoni, is-servizzi marittimi, l-edukazzjoni u bejn l-istituzzjonijiet taż-żewġ pajjiżi. Huma nnutaw il-potenzjal biex il-bażi industrijali u teknoloġika dejjem tikber tal-Polonja tintrabat aktar mal-punti b’saħħithom ta’ Malta fis-servizzi, fis-setturi diġitali u fl-ekonomija marittima.
Id-diskussjonijiet iffukaw ukoll fuq id-direzzjoni futura tal-Unjoni Ewropea. Il-Ministru Fearne u d-Deputat Prim Ministru Sikorski qablu dwar il-ħtieġa ta’ Unjoni Ewropea li tkun effettiva u kapaċi taġixxi, filwaqt li tħares ir-rwol u l-parteċipazzjoni effettiva tal-Istati Membri kollha, irrispettivament mid-daqs tagħhom. F’dan il-kuntest, ġie diskuss ukoll it-tkabbir futur tal-Unjoni u l-importanza li tinżamm l-ugwaljanza bejn l-Istati Membri.
Il-Qafas Finanzjarju Pluriennali li jmiss kien ukoll fost it-temi ewlenin diskussi. Malta u l-Polonja huma t-tnejn membri tal-Ħbieb tal-Koeżjoni u għandhom interess komuni li l-Unjoni Ewropea tindirizza l-prijoritajiet ġodda, filwaqt li tkompli tappoġġja l-koeżjoni, il-kompetittività, l-investiment u żvilupp ekonomiku sostenibbli madwar l-Unjoni.
Il-Ministri skambjaw ukoll fehmiet dwar is-sitwazzjoni Ewropea u reġjonali, fosthom l-iżviluppi fl-Ukrajna u fil-Libja. Huma ddiskutew il-ħtieġa li s-sigurtà Ewropea titqies b’mod komprensiv, b’attenzjoni kemm lejn il-Lvant kif ukoll lejn in-Nofsinhar tal-Ewropa. Il-Ministru Fearne saħaq li l-iżviluppi fil-Mediterran huma marbuta mill-qrib mas-sigurtà, ir-reżiljenza ekonomika u l-prosperità tal-Ewropa.
Aktar tard matul il-jum, il-Ministru Fearne attenda ċ-ċelebrazzjonijiet uffiċjali li mmarkaw Jum Malta u l-55 anniversarju mit-twaqqif tar-relazzjonijiet diplomatiċi bejn Malta u l-Polonja. Fl-indirizz tiegħu, huwa rrifletta dwar kif ir-relazzjonijiet bejn iż-żewġ pajjiżi żviluppaw matul dawn l-aħħar ħames deċennji u nofs, b’rabtiet dejjem aktar b’saħħithom fit-turiżmu, fin-negozju u bejn il-popli taż-żewġ pajjiżi.
