Malta qed taħdem biex tkompli tissaħħaħ l-azzjoni fuq livell Ewropew bil-għan li l-konsumaturi u n-negozji jkunu protetti miż-żieda fl-ispejjeż tal-enerġija, filwaqt li jiżdiedu l-isforzi favur aktar effiċjenza fl-enerġija u t-tisħiħ tas-sigurtà tal-provvista.
Il-Ministru għall-Enerġija Miriam Dalli pparteċipat fil-Laqgħa Informali tal-Ministri tal-Enerġija tal-Unjoni Ewropea li saret f’Dublin taħt il-Presidenza Irlandiża tal-Kunsill tal-Unjoni Ewropea.
Il-laqgħa ġabret flimkien lill-Ministri għall-Enerġija tal-Istati Membri, rappreżentanti tal-Kummissjoni Ewropea u msieħba mistiedna għal diskussjonijiet iffukati fuq l-affordabbiltà tal-enerġija, l-innovazzjoni u t-tibdil fis-swieq tal-enerġija, kif ukoll fuq is-sigurtà enerġetika Ewropea u l-kooperazzjoni.
Il-Ministru Dalli saħqet li l-Ewropa għal darb’oħra tinsab għaddejja minn perjodu sensittiv għas-swieq tal-enerġija, fl-isfond ta’ instabbiltà ġeopolitika kontinwa u pressjoni ġdida fuq il-prezzijiet tal-enerġija.
“Diġà għaddejna minn diversi kriżijiet, mill-gwerra tar-Russja kontra l-Ukrajna sas-sitwazzjoni attwali fil-Lvant Nofsani, li għal darb’oħra qed tpoġġi pressjoni fuq il-prezzijiet tal-enerġija. Dan ifisser spejjeż ogħla għall-elettriku u l-fjuwils u, konsegwentement, pressjoni akbar fuq l-Istati Membri differenti,” qalet il-Ministru Dalli.
Hija enfasizzat li dawn il-pressjonijiet jinħassu b’mod partikolari fi Stati Membri gżejjer bħal Malta u l-Irlanda, fejn ir-realtajiet ġeografiċi jistgħu joħolqu sfidi addizzjonali fejn jidħlu s-sigurtà tal-enerġija, il-konnettività u l-ispejjeż.
“Għal Malta, il-prijorità tagħna tibqa’ li nappoġġjaw lill-konsumaturi, lill-familji u lin-negozji, b’mod partikolari lill-ħafna persuni li jaħdmu għal rashom u lin-negozji ż-żgħar tagħna. Madankollu, dan ma jfissirx li għandna naċċettaw ħela bla bżonn. Se nkomplu nimbuttaw għal aktar effiċjenza fil-mod kif nużaw l-enerġija,” qalet il-Ministru Dalli.
L-affordabbiltà tal-enerġija kienet fil-qalba tal-ewwel sessjoni ta’ ħidma matul il-laqgħa, segwita minn diskussjonijiet dwar l-innovazzjoni u t-tibdil fis-swieq tal-enerġija, kif ukoll dwar is-sigurtà enerġetika Ewropea u l-kooperazzjoni. Il-Kunsill informali għandu l-għan li jiffaċilita skambju strateġiku ta’ ideat qabel il-laqgħat formali tal-Kunsill tal-Enerġija aktar tard din is-sena.
Il-Ministru Dalli qalet li Malta se tkompli tinsisti għal miżuri Ewropej li jirriflettu ċ-ċirkostanzi differenti tal-Istati Membri, inklużi r-realtajiet partikolari li jaffaċċjaw pajjiżi gżejjer, filwaqt li tappoġġja investiment f’enerġija aktar nadifa, aktar effiċjenza u infrastruttura tal-enerġija aktar b’saħħitha.
“Fi żmien meta l-prezzijiet tal-enerġija għal darb’oħra jinsabu taħt pressjoni, jeħtieġ li nħarsu lejn liema miżuri jistgħu jittieħdu fuq livell Ewropew biex nappoġġjaw lill-Istati Membri, lill-konsumaturi u lin-negozji, filwaqt li nkomplu bit-tranżizzjoni lejn sistema tal-enerġija aktar effiċjenti, sigura u sostenibbli,” temmet tgħid il-Ministru Dalli.
