Bil-pożizzjoni strateġika tagħhom fiċ-ċentru tal-Mediterran, il-Gżejjer Maltin jispikkaw fost l-aqwa postijiet fir-reġjun Mediterran, u dan minħabba l-kultura tant imżewqa tagħhom, l-istorja rikka, l-attrazzjonijiet varji, u fl-aħħar u ċertament mhux l-inqas, il-poplu Malti akkoljenti u ġeneruż.
L-arċipelagu Malti jikkonsisti fi tliet gżejjer - Malta, Għawdex u Kemmuna - mifruxa fuq spazju ta’ 316 km2 biss. Għalhekk il-Gżejjer Maltin huma wieħed mill-iżgħar stati fid-dinja iżda wkoll wieħed mill-pajjiżi bl-akbar densità. Fil-fatt il-popolazzjoni Maltija tammonta għal iktar minn 470,000 resident. Hemm 67 kunsill lokali li minnhom 53 jinsabu Malta u 14 f’Għawdex. Il-Gżejjer Maltin jinsabu fir-rotta bejn l-Afrika u l-Ewropa, eżattament 93 km fin-Nofsinhar ta’ Sqallija u 288 km fit-Tramuntana tal-Libja.
Malta hija l-ikbar mit-tliet Gżejjer u fiha hija kkonċentrata l-attività kulturali, kummerċjali u amministrattiva. Warajha bħala daqs hemm Għawdex fejn l-ambjent huwa iktar rurali; wieħed jista’ jirrilissa f’ambjent ta’ kampanja u ħdura mingħajr ħafna bini u traffiku. Imbagħad hemm Kemmuna fejn tista’ tgħid ma jgħixux nies. Ħafna jiddeċiedu li jmorru xi mawra ta’ ġurnata jew mixja fit-tul fuq din il-gżira żgħira.
Il-Gżejjer Maltin jattiraw ħafna viżitaturi minħabba l-klima tipika Mediterranja tagħhom, karatterizzata minn sajf sħun u xitwa moderata. It-turisti jistgħu jgawdu wkoll id-diversi bajjiet u l-postijiet ta’ divertiment u n-nightlife pjuttost ħajja flimkien mal-istorja twila u mqanqla tal-Gżejjer Maltin li tmur lura 7,000 sena.
ĦARSA ĠENERALI LEJN IL-GŻEJJER MALTIN
| Popolazzjoni | 514,564 (sa' 2019)
| |
|
Daqs | 316 km2 | |
|
Lingwa | Malti u Ingliż (it-tnejn li huma huma lingwi uffiċjali) | |
| Reliġjon | Kattolika | |
|
Munita | Ewro | |
| Elettriku | 230 Volts, 50Hz. Plakek kwadri bi tliet pinnijiet bħal tar-Renju Unit | |
| Prefiss Telefoniku | +356 | |
|
Żona tal-Ħin | GMT +1
| |
|
Tip ta’ Gvern | Repubblika
| |
| Innu Nazzjonali |
L-Innu Malti, kitba ta’ Dun Karm Psaila u mużika ta’ Robert Sammut | |
| Simbolu Nazzjonali | Is-Salib ta' Malta | |
|
Rikonoxximent Nazzjonali | Ġieħ ir-Repubblika, Midalja għall-Qadi tar-Repubblika | |
Il-bandiera maltija
Il-Bandiera Maltija hija maqsuma vertikalment f’żewġ nofsijiet, wieħed abjad u l-ieħor aħmar, bil-George Cross fir-rokna ta’ fuq man-naħa tal-arblu. Jingħad li dawn il-kuluri jmorru lura għall-Ordni tal-Kavallieri ta’ San Ġwann. Il-George Cross ingħata lill-abitanti tal-gżejjer Maltin mir-Re Ġorg VI tar-Renju Unit bħala rikonoxximent tal-qlubija u l-kuraġġ tagħhom matul it-Tieni Gwerra Dinjija.
BTAJJEL UFFIĊJALI F’MALTA
| | |
| L-Ewwel tas-Sena | In-Nawfraġju ta’ San Pawl | San Ġużepp |
| Jum il-Ħelsien | Il-Ġimgħa l-Kbira | Jum il-Ħaddiem |
| Sette Giugno | L-Imnarja | Santa Marija |
| Jum il-Vittorja | Jum l-Indipendenza | Festa tal-Immakulata Kunċizzjoni |
| Jum ir-Repubblika | Il-Milied | |
| | | |
Għal aktar informazzjoni dwar il-ġranet tal-Festi Pubbliċi, ikklikkja
hawn.
